06
07.2021

|孕記の享|我的「極速」懷孕秘方 ✿ 由內到外的備孕心得分享

親子育兒(健康)  
標籤: baby  懷孕  孕記  備孕 

上回同大家分享我的懷孕14週的全紀錄,都提及過我地試左2個Circle就成功了,好多身邊已婚又想有小朋友的朋友都紛紛想向我偷私~

 

其實我也不是用了什麼秘方,打從我地準備結婚時候,都有生BB呢個計劃,我就已經開始注意自己的身體狀態,慢慢地令自己過著習慣性一般的「養生」生活習慣,先至可以造就我今次「極速」懷孕計劃!

 

所以話雖是「極速」,但我是用了應該有3年半左右時間去準備自己的身體,以下分為幾大項,可以俾大家知道我如何由內到外去準備好自己身體去迎接呢項「世紀大任務」:

 

  1. 飲食

 

-  戒凍飲凍食

 

 

首先就係由食方面開始著手,因為我由細到大都有經痛問題,試過曾經痛到嘔添~係街企都企唔穩,所以我其實好早已經開始減少凍飲/凍食,不過凍飲同雪糕雪條其實係好難忍,我偶爾都會食,但我會揀唔係準備經期前一星期食,自我感覺良好少少,慢慢我嘅經痛都有改善,當然唔可能完全唔痛,但至少我已經好耐冇食止痛藥了!

 

(有BB時就要戒食軟雪糕了~因為未經消毒的雪糕好易有李斯特菌,對BB同孕婦都好危險架!至於孕初期我就所有凍野凍飲都唔食,唔怕一萬至怕萬一;而到孕中後期,營養師講可以一個月食半杯左右份量(經巴氏德消毒的雪糕雪條),但我暫時到宜家都係老公食果時痴一啖咋!)

 

-  戒食魚生

 

 

由開始計劃結婚都預算自己有生育計劃,其實一直都知道魚生刺身係多食係唔健康,聽聞係好多水銀,食左入身體要成一年時間先分解到呢D毒素~所以我就開始戒完全唔食魚生,至今已經有差唔多3年時間冇食過,好在我對魚生的欲望都唔係太大,所以冇癮起!

 

(當然有左BB時更加唔可以食,因為好易有李斯特菌,同樣對BB同孕婦都好危險架)

 

-  減少重口味食物

 

其實我本身係口味方面都食得比較清淡,太咸太甜太辣我都頂唔順,但我知有部份人都中意比較重口味食物,例如雞煲、酸菜魚、四川麻辣等等,其實呢D本身食多都唔健康,比較高鈉,平常人長期吸入對健康唔好,加上呢D重口味食物會比較刺激胃腸,有左BB就要特別注意!

 

-  減少咖啡因

 

 

聽過好多人有BB後要戒咖啡好痛苦,好幸運我本身唔鍾意飲咖啡同奶茶,所以唔洗特別戒,但茶類我就好鍾意飲,我未有之前都間中飲下茶,但到有BB後就真係少飲左好多,基本上一個月都飲唔到一杯份量~

 

所以如果想準備懷孕,本身又好鍾意飲咖啡同奶茶,我建議可以慢慢開始減少飲用次數,可以俾自己一個適應期,當Bingo之後再戒都會相對容易冇咁痛苦!

 

-  減少高糖及加工食品

 

 

糖份對身體一向都冇特別益處,相反你食過量,身體就會積聚脂肪,變得容易肥胖,如果有BB後更加要特別減少糖份吸收,因為有妊娠糖尿對孕婦同BB都好危險架!

 

而加工食品大家都知係高鈉同精製食品,正常人吸收得多都唔健康,更何況係大肚婆!

 


 

三分運動七分飲食,因為懷胎十月一D都唔簡單,少D氣力都唔得,隨便BB慢慢長大,成個人都要用Energy去支撐身體,加上運動可以增加身體血液循環,自己身體好D先可以孕育出健康嘅BB嘛!

 

雖然我唔講得上係運動熱血份子,在懷孕前一年開始Join瑜伽及健身班,一星期上一堂總好過動也不動~

 

我也有間中在家睇Youtube做Workout,最常睇就係Coffee的影片啦,佢嘅片由低能量到高能量都有,可以按自己的適應力去選擇,點都好,自己屋企做都要講恆心,不能一步登天,持之而行就會有見到身體慢慢改善了!

 

  1. 孕前身體檢查

 

好多準夫婦都會多數係婚前做婚前檢查,如果你地決定結婚後就會準備生BB,身體檢查係可以選擇係婚前做,但我就選擇在計劃生育前一年才去做身體檢查,算做不遲也不早吧?!因為我覺得身體狀況會隨著年齡而有所變化,當然到了某個年紀,定期做身體檢查都係必須的,所以可以按自己的計劃去決定幾時做檢查~

 

孕前身體檢查我覺得是必須的,因為可以檢查到雙方是否有遺傳病係唔適合懷孕,男方可以檢查精子量及活躍度,而女方就可以做子宮頸抹片檢查及超聲音,可以檢查是否有細菌異常/子宮內是否有異常狀況,如果不幸驗到有問題,也需要花時間先將問題一一治療好才懷孕,可以減少懷孕時的危險~

 

最後也要留意檢查部份是否有檢查女方乙型肝炎疫苗抗體,因為有部份80後出世的是沒有接種這款疫苗,如果女方沒有抗體/抗體已經減少就需要安排再次接種,因為乙型肝炎係會傳俾BB,接種後3個月內都唔可以懷孕,所以如果有計劃生育前要盡早去做孕前身體檢查了!

 

  1. 中醫調理

 

中醫博大精深,所以如果對中醫唔抗拒的,可以嘗試去睇中醫調理身體,因為好多女人都有寒宮/經痛問題,可以按自己身體情況決定幾時去睇中醫,而我自己就係一邊備孕一邊去睇中醫,食了幾星期中藥,經期又真係準時來訪,搞到頭一個Circle計錯數!哈哈!不過經期準時也是一件好事!

 

至於男方是否需要中醫調理就視乎你另一半對於中醫抗唔抗拒,我老公就對中醫都麻麻地,所以我都冇強迫他一齊睇,不過如果試左一段時間都唔成功,可以嘗試下無妨!

 

  1. Supplement營養補充品


 

 

女方在備孕前3個月就應該要開始食葉酸,可以幫助BB腦部發展,但留意份量,一開初唔好買800mcg份量的,因為份量太多對身體未必有益處,我自己就係HKTVMALL買了Jamieson 400mcg嘅葉酸,其實我食左未夠2個月就Bingo了,但係其實影響唔會太大的~

 

至於,男方其實市面上都沒有太多選擇,我就買了menevit準爸爸配方俾老公食,佢亦都係同我同步開始食的,至於身體轉變都冇覺得特別~大家可以恆量一下需唔需要啦!

 

  1. Check 體溫

 

相信好多女士們都聽過呢個方法,呢個方法都係同事教我的,可以買體溫計於每天早上起身前沒有太大郁動時量度,然後用APP記下每日的體溫,因為排卵期的體溫係比較高的,可以收集數據3個月左右就可以了解到自己的Circle如何~

 

不過體溫都只能參考,因為量度體溫時間或體溫計的準繩度有少少偏差就唔同了!

 


 

 

以上就係我用過的2款體溫計,粉紅色那款是量度到小數後2個位,準確度會比Watsons果支!

 


 

而APP我就只用了這個去紀錄,都算幾全面,不過到我Bingo後就沒有用了,也不能紀錄Bingo的日子,到時可以要轉APP了!

 

我覺得可以即管試試,但千萬不要準信,因為每個人的排卵期都唔同28, 29, 30或者40等,我就係屬於經期唔算太準的,每個月由28-40日都試過,所以在我身上參考體溫紀錄及APP內的預算排卵期每次都有偏差!哈哈!

 

  1. 排卵試紙

 

用排卵試紙係最科學又比較便宜的方法可以準確知道排卵期,因為卵子生命好短暫,排卵後只有24小時存活時間,只要有一日偏差都會白交做課~

 

市面上都有唔同的排卵試紙,最多人用的應該都是大衛排卵試紙,優點係夠平,但要每日估計檢驗結果的深淺色真係令人好苦惱,我自己就覺得呢款好麻煩,而且日日要玩尿真係冇壓力都變做有壓力~

 

 

所以今次Bingo最大幕後功臣就係Clearblue排卵棒,優點係佢有電子屏幕直接顯示當日是否排卵期,唔洗估估下,但係會比較貴(2百幾只有10支試紙),令好多人卻步,同埋都聽人講就算用佢都未必一次就Bingo,所以就視乎大家點睇了!

 

 

 

 

  1. 心情/心理質素調節

 

剛才提及的備孕項目其實基本上都唔難辦得到,最難的部份就是調節心情~

 

因為我好相信一個人心情/心理質素係好影響自己身體的狀況,在備孕時我都有睇到好多資料,其實要孕育一個生命真係唔係易事,即使受精著床都會有好多不同原因令胚胎未能生存下去,醫學上也暫時無法解釋~

 

所以大家無論在Check體溫/用排卵紙等時間,都要盡量放鬆心情,相信講就易,做起上黎都幾難,要記住小天使會唔會來臨都係天賜禮物,大家都要抱住順其自然下做些備孕準備,好好放鬆自己,千其唔好將交功課係例行的事情,咁樣亦都會影響到兩公婆的感情架!

 

 

 

希望以上都可以幫到大家,如果試左一年或以上都未能成功,或者就要考慮去睇下醫生作一個詳細身體檢查了!祝大家好孕!

 

 

**********************************

歡迎合作試用.邀稿.出席活動.化妝工作

Wing Ho

E-mail : fingyan.wing@gmail.com fingyanwing.makeup@gmail.com

Facebook : www.facebook.com/fingyanwing.makeup

Instagram: FINGYANWING.MAKEUP

YouTube: https://www.youtube.com/c/FingyanWing

*********************************

發表於2021.7.06
留言(0)
博客名稱 :
FingyanWing
網誌名稱:
Fingyan Wing MakeUp - Blog
使用天數:2,410
性別:
年齡:5
電郵:fingyan.wing@gmail.com
按月份瀏覽
    2021
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
    2020
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 攝影寫真
  • 戀愛心情
自行分類
最新留言